ნარეკვავის წყალსაცავის რეაბილიტაცია


სოფლის მეურნეობის სამინისტრო და საქართველოს გაერთიანებული სამელიორაციო სისტემების კომპანია რწყვის სეზონის პარალელურად, სარწყავი და სადრენაჟე სისტემების რეაბილიტაციას აგრძელებს.

კომპანია მცხეთა-მთიანეთის რეგიონში, დუშეთის მუნიციპალიტეტში ახორციელებს ნარეკვავის წყალსაცავის კაშხლის და კატასტროფული წყალსაგდების აღდგენა-რეაბილიტაციას.

პროექტით გათვალისწინებულია კაშხლის სადაწნეო ფერდის  დაზიანებული უბნების აღდგენა; კატასტროფული წყალსაგდების  თხემისა და დამეწყრილი კალაპოტის რეაბილიტაცია.   დაგეგმილია ექსპლუატაციის სამსახურის შენობის, კაშხლის ქვედა ბიემთან მისასვლელი გზის და  მექანიკური ნაწილის  რეაბილიტაცია. 

მიმდინარე სარაბილიტაციო ღონისძებების განხორციელებით, მცხეთა-მთიანეთის რეგიონის  7 სოფლის (მჭადიჯვარი, შუახევი, ლამოვანი, ციხედავი, წიწამურა, ძალისის ნაწილი, მუხრანის ნაწილი)  1 600 ჰექტარ სასოფლო-სამეურნეო მიწის ფართობზე გაუმჯობესდება წყლის მიწოდება. აღნიშნული ფართობით დაახლოებით   3 000 მოსახლე ისარგებლებს.

ნარეკვავის წყალსაცავის კაშხლის და კატასტროფული წყალსაგდების აღდგენა-რეაბილიტაციის სამუშაოები მიმდინარე წლის მარტში დაიწყო და 2016 წელს დასრულდება.  პროექტის ღირებულებაა  4 384 999 ლარი.

საქართველოს გაერთიანებული სამელიორაციო სისტემების კომპანია დღეისათვის მცხეთა-მთიანეთის რეგიონში სარწყავი და სადრენაჟე სისტემების მოდერნიზაციის ფარგლებში, ახორციელებს    3 პროექტს, ხოლო საქართველოს მასშტაბით 34 ობიექტზე მიმდინარეობს სარეაბილიტაციო ღონისძიებები.

ვიდეოს სანახავად გადადით ბმულზე